Եվս մեկ անհանգիստ գիշեր սահմանի վրա

   Վերջին օրերին հայ-ազերական սահմանի վրա նկատված լարվածությունն օրըստօրե ավելի է մեծանում։ Ստեպ-ստեպ սահմանային բնակավայրերի վրա արձակվող կրակահերթերը հուլիսի 31-ի երեկոյան արդեն համատարած բնույթ ստացան։ Գնդակոծվում էին Տավուշի մարզի գրեթե բոլոր սահմանամերձ բնակավայրերը։ Նոյեմբերյանի և նրա հարակից տարածքներում ավտոմատներից և խոշոր տրամաչափի գնդացիրներից գնդակոծվում էին Բերդավան, Բարեկամավան, Ոսկեպար և Բերքաբեր գյուղերը։ Գնդակոծությունն առանձնապես ակտիվ էր Բերքաբերի ուղղությամբ, որտեղից լսվում էին նաև արկերի պայթյուններ։ Գյուղի բնակիչների հավաստմամբ հայկական դիրքերի վրա հակառակորդի կողմից կրակում էին նաև նռնականետերով։ Բերքաբերում գնդակոծությունը մեծ ակտիվությամբ շարունակվեց մինչև ժամը 23 - ի սահմանները։ Հայկական ուժերի համարժեք գործողություններից հետո Բերքաբերի ուղղությամբ կրակը դադարեց, սակայն արդեն ակտիվացան Ոսկեպարի ուղղությամբ տեղակայված թշնամու կրակակետերը։ Կեսգիշերին մոտ միայն կրակահերթերը դադարեցին։ 

   Բնակիչների հավաստմամբ՝ բնակելի շինությունների մասնակի վնասվածքներ կան բոլոր բնակավայրերում։ Ոսկեպարում վնասվել են մի քանի տների տանիքների ծածկեր և պատուհաններ։ Փառք Աստծո, մարդկային վնասներ չկան։ Ողջ գիշեր անվտանգության նկատառումներով մայրուղու Ոսկեպար- Բաղանիս հատվածում երթևեկությունը կատարվում էր Ոսկեպար գյուղով ևՀարսնաքարի տարանցիկ  ճանապարհով։

   Լուսաբացին նորից հնչեցին մի քանի կրակահերթեր, իսկ հեռվում  լսելի էին խուլ որոտներ՝ հավանաբար Շամշադինի տարածաշրջանի ուղղությամբ։ Այս պահին հարաբերական անդորր է սահմանի վրա՝ օդում առկախ անորոշությամբ․․․ Ի"նչ է սպասվում վաղը։ Դժվար թե որևէ մեկը կարողանա պատասխանել այս հարցին․․․

Հ․Ալավերդյան